ភ្នំពេញ៖ ឯកអគ្គរដ្ឋទូតនៃសាធារណរដ្ឋឆែកលោក ម៉ាទីន វែវរ៉ា (Martin Vavra) បានជម្រាបប្រធានរដ្ឋសភាកម្ពុជា សម្ដេចពញាចក្រី ហេង សំរិន ថាប្រទេសលោកកំពុងពិនិត្យសិក្សាដើម្បីជំរុញកិច្ចសហប្រតិបត្តិការពាណិជ្ជកម្មរវាងប្រទេសកម្ពុជា និងសាធារណរដ្ឋឆែកឱ្យកើនឡើង។ លោកបានលើកឡើងបែបនេះក្នុងជំនួបសំដែងការគួរសមមួយនាព្រឹកថ្ងៃទី២៩ ខែវិច្ឆិកានេះក្នុងពេលដែលលោកត្រូវកាន់ជាតំណែងឯកអគ្គរដ្ឋទូតថ្មីនៃសាធារណរដ្ឋឆែកប្រចាំព្រះរាជាណាចក្រកម្ពុជា។

លោក ម៉ាទីន វែវរ៉ា បានលើកឡើងថាប្រទេសឆែកនឹងជំរុញការវិនិយោគនៅកម្ពុជាបន្ទាប់ពីប្រទេសវៀតណាម និងប្រទេសថៃធ្វើយ៉ាងណាឱ្យមានកិច្ចសហប្រតិបត្តិការពាណិជ្ជកម្មរវាងប្រទេសទំាងពីរឲ្យកាន់តែមានទំហំធំឡើង។

ជាការឆ្លើយតប សម្ដេចពញាចក្រី ហេង សំរិន បានគាំទ្រចំពោះការលើកឡើងនេះនឹងសង្ឃឹមថាប្រទេសកម្ពុជា និងឆែកនឹងអាចបង្កើនទំហំពាណិជ្ជកម្មឱ្យកាន់តែខ្លាំងក្លាបន្ថែម។ សម្តេចបានលើកឡើងថាកម្ពុជានិងឆែក បានភ្ជាប់ទំនាក់ទំនងកិច្ចសហប្រតិបត្តិការជាមួយគ្នាអស់រយៈពេលជាយូរមកហើយ ហើយប្រជាជាតិទាំងពីរទទួលបានផ្លែផ្កាដែលកើតចេញពីកិច្ចសហប្រតិបត្តិការដ៏ល្អនេះជារៀងរហូតមក។ នៅក្នុងដំណាក់កាលជាបន្តបន្ទាប់ ឆែកបានរួមចំណែកអភិវឌ្ឍកម្ពុជាយ៉ាងច្រើន គឺតាំងពីអតីតឆេកូស្លូវ៉ាគី រហូតដល់បច្ចុប្បន្ន។

សម្តេចប្រធានរដ្ឋសភាមានជំនឿថា បេសកកម្មការទូតថ្មីរបស់លោក ម៉ាទីន វែវរ៉ា នៅកម្ពុជាពិតជាមានសារសំខាន់ក្នុងការបន្តលើកកម្ពស់ទំនាក់ទំនងចំណងមិត្តភាពនិងកិច្ចសហប្រតិបត្តិការរវាងប្រទេសទំាងពីរដែលមានស្រាប់ឱ្យកាន់តែល្អប្រសើរមួយកម្រិតថែមទៀត។

ព្រះរាជាណាចក្រកម្ពុជា និងសាធារណរដ្ឋឆែកបានបង្កើតទំនាក់ទំនងការទូតនៅឆ្នាំ១៩៥៦ ក្រោមស្នាព្រះហស្ថរបស់ ព្រះករុណា ព្រះបាទសម្តេចព្រះ នរោត្តម សីហនុ «ព្រះបរមរតនកោដ្ឋ» ជាមួយអតីតថ្នាក់ដឹកនាំឆែកជំនាន់មុន។ រហូតមកដល់ពេលនេះទំនាក់ទំនងការទូតប្រទេសទាំងពីរមានរយៈពេល៦៥ឆ្នាំហើយ។ ហើយព្រះមហាក្សត្រកម្ពុជាបច្ចុប្បន្នសម្ដេចព្រះករុណាព្រះបាទ សម្តេចព្រះបរមនាថ នរោត្តម សីហមុនី ក៏ទទួលបានការសិក្សារៀនសូត្រនៅសាធារណរដ្ឋឆែកផងដែរ។

យោងតាមគេហទំព័រ trading economic ទំហំពាណិជ្ជកម្មរវាងកម្ពុជា និងសាធារណរដ្ឋឆែក ក្នុងឆ្នាំ២០២០មានទំហំប្រមាណជិត៧៤លានដុល្លារអាមេរិក ថយចុះប្រមាណ៤៦លានពីឆ្នាំ២០១៩៕